Búið að staðfesta þátttöku Reykhólahrepps í Brothættum byggðum

Reykhólahreppur hefur nú hafið þátttöku í byggðaþróunarverkefninu Brothættar byggðir. Í gær var undirritaður samningur þess efnis á milli Byggðastofnunar, Reykhólahrepps og Vestfjarðastofu. Byggðarlagið er það fimmtánda í röðinni sem hefur þátttöku í verkefninu frá því að það hóf göngu sína á Raufarhöfn árið 2012. Nú fer í hönd undirbúningsvinna að þátttöku samfélagsins og samstarfsaðila í verkefninu þ.m.t. myndun verkefnisstjórnar, stöðugreining, könnun meðal íbúa og undirbúningur íbúaþings. Gert er ráð fyrir að íbúaþing verði haldið fljótlega á nýju ári. Þar mun íbúum gefast mikilvægt tækifæri til að ræða hagsmunamál byggðarlagsins og móta áherslur í verkefninu.

Samningur til fimm ára

Sú nýjung er að samningur um verkefnið er gerður til fimm ára í stað fjögurra líkt og áður hefur verið gert í þátttökubyggðarlögum Brothættra byggða. Því er gert ráð fyrir að verkefnið vari til ársloka 2029. Með lengingu framkvæmdatímabils standa vonir til að hægt verði að ná auknum árangri og skjóta styrkari stoðum undir atvinnulíf, mannlíf og búsetu í Reykhólahreppi.

Íbúar hvattir til virkrar þátttöku

Vonir standa til að íbúar Reykhólahrepps taki virkan þátt í verkefninu og er það tilhlökkunarefni að hefja verkefnið með þeim af fullum krafti. Margt spennandi er að gerast í sveitarfélaginu en með verkefninu Brothættum byggðum gefst íbúum tækifæri til að stuðla að enn frekari grósku í samfélaginu.

Af vef Byggðastofnunar