U.M.F. Afturelding 100 ára

Í dag, 14. mars, eru 100 ár frá stofnun Ungmennafélagsins Aftureldingar. Félagið er eitt af aðildarfélögum í Ungmennasambandi Dalamanna og Norður-Breiðfirðinga (UDN).

Í fyrri tíð voru starfandi ungmennafélög í öllum hreppunum fimm í sýslunni, sem frá 1987 mynda saman Reykhólahrepp, þau voru:

• Ungmennafélagið í Flatey, stofnað 1909 (ekki er vitað hvenær það varð óvirkt).
• Ungmennafélagið Vísir í Múlasveit, stofnað 1928 (síðasti skráði fundur 1957).
• Ungmennafélagið Hvöt í Gufudalssveit, stofnað 1927 (starfsemin lagðist af um 1956).
• Ungmennafélagið Unglingur í Geiradal, stofnað 1909 (síðasti skráði fundur 1980, sameinað Aftureldingu 1989).
• Ungmennafélagið Elding í Reykhólasveit, líklega 1906 - 1910, en litlar heimildir eru til um félagið.
• Ungmennafélagið Afturelding í Reykhólasveit, stofnað 1924, starfar enn og er jafnframt eina starfandi ungmennafélagið í Austur-Barðastrandarsýslu /Reykhólahreppi.

Í dag eru 82 félagar í Aftureldingu og af þeim eru 30 iðkendur á aldrinum 10 - 45 ára. Í samvinnu við tómstundafulltrúa Reykhólahrepps eru æfingar í fótbolta, bogfimi, líkamsrækt og hestaíþróttum. Á sumrin heldur samstarfið áfram þar sem tómstundafulltrúi er með leikjanámskeið og ungmennafélagið sér um íþróttaæfingar.

Ungmennafélagið er með líkamsræktaraðstöðu í kjallara Grettislaugar og stendur til að gera endurbætur á henni á þessu ári. Þar er sami opnunartími og hjá Grettislaug.

Stjórnina skipa í dag Styrmir Sæmundsson formaður, Katla Ingibjörg Tryggvadóttir ritari og Sandra Rún Björnsdóttir gjaldkeri.

Stjórn Aftureldingar stefnir að því að vera með afmælisfagnað í lok júnímánaðar í tilefni 100 ára afmælisins þar sem öll eru velkomin.